Wahlgedicht (Walter Schäfer - Zeremoniar)

 

Hoch vereerti Wahlversammlig

Mit ere haigglen Uffgoob simmer in dä Oobe gstartet                               

Drey Spitzegreft im Voorstand ruumen iire Blatz                                      

Zunftbriederlig veraint, i hätts nit anders mir erwartet                                  

Bestimme mir fir Zuekunft kompetänt Ersatz.                                                    

Was ibrig blybt im Zunftvorstand wird kreftig duuregspattet

S isch guet, ass men au alti Pflanzen ebbe düngt

Und ass es bi de Kürschner au no 2026 battet

Het me das Gremium jetz substanziell verjüngt

So wyt, so guet, was solls – kennt me ze däm Ergääbnis saage

Ooder – wie me z Basel daigig motze wuurd, s isch rächt

Wäär ney im Vorsitz hoggt, soll klagloos jetz der Bättel draage

Und d Altvorständ kasch dädä  -– Nai! Das fänd i schlächt!

Als No-Vorstand und neyerdings sogar der eltscht vo dääne

Als Zeremoniar – äxgyysi – Pausegloon

Han i begriffe – und i find, me kas nit gnueg erwähne

E Zunft sott Stil ha – fascht no mee als Tradition.

Zem Stil gheert nääben aa-dressierter Knigge-Etigette

Und geegesyttigem Respäggt sogar im Stryt

Fir mi – doo wuurd i, wenn is hät – e ganz Vermeege wette

Au Danggbarkait, will si nyt koschtet, usser Zyt

Die Zyt nimm ich im Naame vo uns alle fir uns alli

Fir die, wo künftig «Alt» stooht vor der Funggtioon

Nadyyrlig hoff i, ass au unser Abschiedsgschänggli gfalli

Zerscht aber s Danggerscheen als Demonstration.

Danggscheen em Rolf in alle Funggtioone bis ganz oobe

Im alle Gfalle iberdrybsch es fascht e bitz

Als «schampar liebe Siech» het me di gäärn und muess di loobe

Und denn sin doo notfalls jo au no diini Witz

Danggerscheen, Alex, fir di Riisenyysatz und di Wisse

Als Irtemaischter gnausoo wie als Mentor und als Frind

Mer wäärde di als Superman fir alli Fäll vermisse

Und sin no lang beiidruggt vo dim harte Grind.

Au danggerscheen em Alt-Statthalter Werni – Maa vo Wält

Als Prototyp vom absolut perfäggte Uffnahm-Zelebrant

Es haisst, är machi statt em Kürschner-Job e Haidigäld

Als Huusfründ vo der Widmer-Schlumpf im Püntnerland.

Danggscheen uf Vorroot schliesslig de drey Noochwuggs-Grossmogule

Mer wintsche guete Muet und Sprungkraft an de Hüürde

Im alte Daigaff-Baseldytsch, im lengscht nimm me so coole

Deent das: Vyyl Fraid und Gligg in Amt und Wüürde …

So – fertig jetz mit all däm Dangg

Vor lutter Drääne wirdsch jo grangg

Drum saag i nummen ains no – barsch:

Standing Ovation, vorwärts marsch!